خريش الشمال
كلمات : ياسر التويجري
الحان وغناء : عبدالعزيز العليوي
عزف : عبدالمجيد الفهاد

الكلمات

تنادوا على الهارب وأثر فالعلوم علوم
على عادة اللي للصقاقير جماعه

خريش الشمال اللي على البرق فيها زوم
سنا جمرةٍ من صالي النار نزاعه

يداور بها دمٍ لـ ورّد على الحيزوم
طغى رقع خافقها على كل سماعه

خريشٍ بداغرها لعجز الطيور و سوم
يا كم طير قومٍ بالسماء فلت اشراعه

تنادوا وجيناها وحنا طوال خشوم
لكن الولع ماله سوا السمع والطاعه

يقدم بنا جبرٍ دقاق الغطى ملموم
على الوكر ثنداته تشيله عن كراعه

تشيخ مثل شيخة معزي بروس القوم
عديمٍ خذا الشيخه على القوم بذراعه

من الراس ابو صفقه الى المخلب المسموم
ما شاء الله ونفوس الرياجيل طماعه

من دبي من مشرق الى غربي ام الدوم
ما يوجد مثل فعله ولا طيب طباعه

حنيش الدفان اللي على الشدق فيه رقوم
ليا شاف في عينه من الربد مرتاعه

يداور على التكيه مثل ربشة الملخوم
لجينا على الحروه واخذ له ربع ساعه

هذا والله اللي لا تمقلت به مدغوووم
مردد قرانيس وخوال امه سباعه

عقب ذابت الخارم ورى كاسرات الحوم
بعد خلفت بقلوب عشاقها الراعه

حذفنا بياض الوجه ومبرهن المقسوم
علاج الولع واقوى بنادول لصداعه

رقى مثل ما ترقى السماء دعوة المظلوم
كسير طلب ربه عقب سال مدماعه

على مثل ما يسحب غزل سلكها المنظوم
تقل يسحبه كفٍ من الغيم ب اصباعه

مطاليعنا لجله من العام لين اليوم
وهو ما قصر دون الترابيع مطلاعه

#ياسر_التويجري
#عبدالعزيز_العليوي