#فلاح_المسردي #الطرف_الكحيل

يا صاحبي شلي جرى
واللي حصل واللي طرى
يا اغلى الاوادم وش بلاك
عقب المحبه والغلا
هجرتني بد الملا
وانا الذي همي رضاك
من غير ذنب ولا خطأ
ولا جفا ولا بطا
اقفيت والخافق معاك
في صدتك وش السبب
ليه الجفا يا اغلى العرب
مني الخطا ولا خطاك
يا راعي الطرف الكحيل
ما عاد لي فالبعد حيل
عود عسى العالم فداك
يا غايتي يا منيتي
لا لا تخيب هقوتي
يازين وانا في رجاك
جعلت لك فالقلب بيت
سكنت به من يوم جيت
وحدك ولا احد معاك
غلاك عندي فوق فوق
يجري مع مجرى العروق
مابه حد في مستواك
فرق الثريا والثرا
فرقت عن كل البرا
في عين محبوبك شراك
يالحب الاول والأخير
مالك مع العالم خشير
والله يعلم عن غلاك
مالي بغيرك فالبشر
واحد وتسوى لك عشر
مالي بغيرك ياملاك
يازين يا عنق الغزال
والله ياحبك مايزال
من قلب ودك واهتواك
فديت انا ذيك العيون
ذيك المحاجر والجفون
سبحان من صور حلاك
والخد براقه لمع
والزين كله مجتمع
في طلتك والله عطاك
زويت معلوقي زوي
زوية خصرك المنزوي
وردتني عد الهلاك
قربك ينسيني العنا
لاعاد تجفاني وانا
مالي من العالم سواك
يا اخر غرامي واوله
عليك ذابحني الوله
يسقى علي ساعة لقاك
عود ولا تبطي ترى
عيني محاربها الكرى
ما ذاقته سبة جفاك
يا صاحبي شلي جرى
واللي حصل واللي طرى
يا اغلى الاوادم وش بلاك
يا اغلى الاوادم وش بلاك .