India rama civil mite chawimawina sang Padma Shri chu zanin (9th May, 2024) President Droupadi Murmu in TNT dintu Sangthankima hnenah a hlan dawn.

Akashvani Correspondent Isaac Zoramsanga nena an inkawmna TNT din tu Pu Sangthankima chuan Padma Shri chu a dawn turah a ngai lo tih sawiin midang amah aia phu tam tak an awm a ti a, chawimawina ropui tak a dawng chu a lawm takzet tih sawiin a dawng dawn tih anlo hrilh tumah pawh lo dawnsawn dan mai a thiamlo tih a sawi.

Pu Sangthankima chuan Fahrah chanhai te tana a inpekna chhan chu Pathian ah harhtharna a chan hnu in midang te tana rawngbawl duhna lian tak a nei a ti a, Pathian malsawmna a dawn chu midang ten hre ve se a duh avang leh Pathian nei ve se a duh avangin TNT bul a ṭan tih a sawi.

Pu Sangthankima chuan midang tana a inpekna ah harsatna tawh changin Pathianin a tanpui thin avangin chauh chang a awm ngailo a ti a, hripui len laiin harsatna tawk ve mahse anmahni vengtu a awm tlat avangin an dam leh mai thin a ti a, Pathian hnathawh avangin midang atangin thilpek an dawng thin a ti a, Aizawl khaw chhunga kohhran hrang hrangah rinna thutiam Faith Promise pe thin mi 500 atanga 600 an nei a ti bawk.

Pu Sangthankima chuan a dam chhungin mi bawrhsawm leh chanhai te leh Isua mamawh te tan inpek zel a tum thu a sawi a, a dam chhan chu midang tana inpek ani tih sawiin a chhandamna chan chu Chhandam hlenna ani a ti a, Pension a awm ve loh avangin dam chhunga kalpui a tum tih a sawi bawk.

Sorkar laipui chuan January ni 26 Republic Day khan kumin atana Civil mite chawimawina hrang hrang, Padma Shri, Padma Bhushan leh Padma Vibhushan dawng turte a puang a, Padma Shri dawng tur mi 34 zingah Mizoram atangin Pu Sangthankima hi a tel ve a ni.

TNT dintu Pu Sangthankima hi khawtlang tana a thawh thatna avanga thlan a ni a, Sorkar laipuiin a tarlan danin, Pu Sangthankima hian mi tam tak tan chenna leh ei leh in bakah an nun siam that kawnga a thawh that avangin Padma Shree chawimawina dawng tura thlan a nih thu a tarlang a ni.

Pu Sangthankima hi Ngawlveite, Fahrahte leh Mi a ten enkawlna tha an dawn theihna turin theihtawpa hma la thin a ni a, kum 30 chhung zet awmna tur neilo leh ngawl vei te tan hma lo la tawhin Northeast hmun hrang hrangah leh Myanmar ah pawh TNT hi din in Assam ah pawh district 4 lai ah a din a ni.

Pu Sangthankima hian Thutak Nunpuitu Team (TNT) hi kum 1988, Nov ni 14 khan Champhai khuaah din in Aizawl, Lunglei, Kolasib, Champhai leh Tahan ah te heng enkawlna hmun hi TNT chuan Pu Sangthankima kaihhruaina hnuaiah a kalpui mek a, TNT ah hian tun dinhmunah Aizawl ah mi 1810 awm in Lunglei District ah mi 748 an awm a, Kolasib ah mi 363 awmin Champhai District ah mi 364 enkawl mek an ni a, Tahan ah mi 250 awmin a vai hian Thutak Nunpuitu Team ah hian mi 3535 an awm mek a ni.